Àteras lìnguas de minoria aìnturu de is làcanas de su Stadu italianu.
Friulanu. Is chi chistionant su friulanu funt unus cincuxentus milla. A-i custa lìngua dda fueddant aìnturu de sa Regioni Autonoma de su Friuli Venètzia Giùlia. Impari a su ladinu dolomìticu fait parti de is lìnguas romanzas de is Alpis. Difatis su friulanu est una lìngua reto-romanza (impari a su romànciu e a su ladinu dolomìticu).
Tedescu. Is chi fueddant su tedescu funt unus cuatruxentus milla intra de Tirolu de giossu (Südtirol), Baddi de Aosta, Venetu, Trentinu e Friuli Venètzia-Giùlia. Sa majoria de is chi chistionant tedescu bivint in su Tirolu de giossu. Is sudtirolesus funt duxentus-noranta milla (290.000) e a-i custus aciungeus is walser e totu is àterus tedescus chi bivint in is logus chi eus giai numenau.
Ocitanu. Is chi chistionant s'ocitanu funt casi duxentus milla e bivint in mesu a is montis de su Piemonti lacanantis cun sa Frantza de giossu. Est fueddau pruschetotu in sa meria de Cuneo.
Slovenu. Is chi chistionant su slovenu funt unu setanta milla e bivint pruschetotu in is provìntzias de Trieste, Gorìtzia e Ùdine, ma in is provìntzias de Trieste e Gorìtzia sceti funt arrespetaus is deretus de sa Carta costitutzionali italiana, ca in Ùdine no ddus ant tambeni postus in efetu.
Ladinu dolomìticu. Is ladinus chistionant una lìngua neolatina chi ddi nant ladinu. Funt unu cincuanta milla e bivint in is baddis dolomìticas (Fassa, Gardena, Badia) intra de Trentinu, Tirolu de giossu e Venetu.
Francu-proventzali. Su francu proventzali e su frantzesu funt is duas lìnguas fueddadas de prus in sa baddi de Aosta. Is chi ddu fueddant funt unus noranta milla.
Frantzesu. Puru su frantzesu est fueddau in sa Baddi de Aosta. Funt binti milla is chi ddu fueddant.
| < Prec. |
|---|