Su Sardu de oindii est una «lìngua noulatina» o «romanza», est nàsciu de su Latinu introdùsiu in su 238 i.C. de is primus sordaus romanus lòmpius in Sardìnnia. Su Sardu, che a su spanniolu, su frantzesu, su cadelanu, su francu-proventzali, fait parti de is lìnguas romanzas de Scurigadroxu (it.“occidentali”). Is documentus prus antigus de su Sardu funt de s’annu milli. Su Sardu est una lìngua bipolari, ca tenit duas bariedadis mannas: su Sardu campidanesu in sa Sardìnnia de giossu (de Casteddu finsas a Aristanis e in s’Ollastra, is su Surcis, in sa Marmidda e in su Gennargentu de giossu) e su Sardu logudoresu/nugoresu in sa Sardìnnia de mesu e de susu (Brabaxa de Ollolai e de Bitzi, Nugoresu, Baronia, Logudoru e Meilogu).

Is circas e is stùdius prus antigus asuba de sa lìngua Sarda funt de su sèculu XVI e funt de Sigismondo Arquer. Ma su mundu at connotu su Sardu che Lìngua a cumentzai de su 1866 sceti gràtzias a is stùdius de Friedrich Diez su tedescu. A sighiri is romanistas tedescus, passendi po is nougramàticus, lompendi finsas a su 1928 cun su Maistu de sa Linguìstiga sarda Max Leopold Wagner su tedescu.

In su 1997 sa R.A.S. (Regioni Autonoma de sa Sardìnnia) at fatu una lei po sa defensa de sa lìngua Sarda: a-i custa ddi nant lei regionali nr 26 de su 1997; in su 1999 su Stadu italianu puru at fatu una lei po sa tutoria de is lesser used language (lìnguas prus pagu imperadas) e po sa primu borta su Stadu at arreconnotu su Sardu che lìngua.

Massimo Madrigale su Dotori.

Po ndi sciri de prus (bibliografia):

Puddu Mario; Istoria de sa limba sarda; Domus de janas.

(Is librus inditaus in custu giassu Internet ddus agatais me in sa Biblioteca Comunali de Siddi e su Comunu ddus at comporaus cun su dinai de sa lei nr 482/1999)