Ufitziu

Asuba de su Pranu de Siddi, a 330 mt de artària, ddoi at su Parcu de sa Fogaia. Est nàsciu che logu comunali po sa defensa e sa tutoria de sa naturalesa. Po ddui lompi tocat a pigai s’arruga chi de su Comunu sighit sa tauledda inditadora »Parco sa Fogaia«, a sa bessida de sa bidda.

Est unu logu bellu meda, aundi ddoi at unu padenti de ilixi stravanau. Is matas de ilixi (quercus ilex) funt mannas meda e nci ndi funt medas chi funt bècias. In custu logu nci funt assumancus 104 spètzias de matas e matixeddas, partzias in 41 famìllias. Labai, imoi, is spètzias prus spainadas: orchis papilionacea; genista morisii; pistacia lentiscu…e aici nendi, po ndi numenai unas cantu sceti.

Ma custu logu est prenu puru de animalis. Nci ndi funt 63 spètzias. Intra de is pillonis: su crobu, su marragau, sa pubusa, sa stria bianca, su vardarolu, sa tzuaddina. Intra de is mamìferus: su margiani e su lèpuri.

Aintru de su parcu ddoi at unu tretu chi ddi nant «su mori de is erbas». Innantis fiat su tretu imperau de sa genti de sa bidda po artziai asuba de sa Giara. Imoi est imperau po fai educatzioni ambientali aundi dònnia spètzia de erba tenit unu billeteddu aundi ddoi at scritu su nòmini scentìfigu, su nòmini in italianu e finsas su nòmini in sardu.

In mesu a su padenti ddoi at finsas unu logu cun is mesas po papai e po si gosai sa bellesa de custu logu aresti.

Artziendi asuba de sa Giara, aintru de is làcanas de su parcu, ddoi at su nuraxi a passadissu de «Sa Fogaia» de aundi si bit totu su pranu e finsas su Gennargentu, Monti Arci e sa Giara de Gesturi. Su nuraxi est postu a Obrescidroxu, in d-una podisura stratègiga po su pranu. Est de s’inghitzu de Brunzu de mesu (1500 – 1200 i.C.). Sa parti prus bècia de su nuraxi tenit una froma a Y. Sa Subraintendèntzia at fatu duus sgavus (su primu in su 1993-1994 e su segundu in su 2003-2004) e at agatau cìcaras, cicaronis, testus e pratus de s’inghitzu de su Brunzu de mesu (curtura de Bunnànnaru B) e in prus una lèsina de brunzu e pratus nuraxesus.

A chini bolit fai una passillada aintru de su Parcu, fait a preguntau novas e agiudu a is ghias de sa Cooperativa Villa Silli (070/939888; 347/511.67.87; Questo indirizzo e-mail è protetto dallo spam bot. Abilita Javascript per vederlo. ).

Massimo Madrigale su Dotori