Sa Marmidda (o Mramidda) est una regioni stòrica de sa Sardìnnia, lacananti cun su Campidanu e cun su Sartzidanu. Po su chi pertocat sa giologia, sa Marmidda est nàscia 30 millionis de annus a oi ca, po mori de s’Africa chi at stùmbiu contras a s’Europa, sa Sardìnnia s’est stesiada de sa costera europea. In su Miocene inferiori (de 24 a 20 millionis de annus a oi) s’àcua de su mari est intrada aundi imoi ddoi est su Campidanu, lompendi finsas aundi imoi ddoi est sa Marmidda e sa Trexenta. In su Messinianu (5 millionis de annus a oi) s’Africa at sighiu a donai colladas contras a s’Europa, stesiendi sèmpiri de prus sa Sardìnnia de sa terramanna europea, fendi sperefundai sa parti de Obrescidroxu (it. “orientale”) in su Mari Tirrenu.

S’atividadi burcàniga, 3 millinonis de annus a oi, at fatu nasci is pranus de sa Marmidda. A-i custus ddis nant «Giaras» fueddu sardu chi ndi benit de sustrau linguìstigu nuraxesu (incapas pre-nuraxesu puru) e chi tradùsiu in italianu inditat “tutti gli altopiani più o meno estesi di forma piana o di altare e di roccia lavica e vulcanica”. Labai is prus famadas: Giara de Gesturi, Giara de Siddi e Giara de Serri. A s’acabu de su Pliocene Superiori e de su Cuaternàriu (de 2 a 1 millioni de annus a oi) sa Marmidda at cumentzau a tenni sa bisura chi connosceus imoi.

Is biddas de sa Mramidda funt: Baràdili, Baressa, Barùmini, Biddanoa Forru, Biddanoa Franca, Crucuris, Forru, Frutei, Gesturi, Gianui, Gonnacodina, Gonnanò, Gonnatramatza, Is Pratzas, Luamadrò, Mara (o Biddamara), Masuddas, Mòguru, Pauli Arbarei, Sardara, Seddori, Segariu, Setzu, Siddi, Soramanna, Tuili e Turri.

Sa Marmidda est prena de nuraxis e de tumbas nuraxesas, innoi nd’arregoradus unus cantu sceti: «Sa Domu de s’Orcu» (de Siddi); «Sa Fogaia» (sèmpiri in Siddi); «Su Nuraxi» (de Barùmini); «Genna Maria» (de Biddanoa Forru) e atrus meda…

Massimo Madrigale su Dotori