Comenti eus giai nau, sa lìngua Sarda est filla de su Latinu introdùsiu in Sardìnnia de is sordaus romanus. Sa latinisadura (o romanisadura) de sa Sardìnnia est cumentzada, duncas, in su 238 innantis de Cristu. Is diferèntzias chi nci funt aintru de sa lìngua Sarda ndi benint de is undadas diferentis de latinisadura de sa Sardìnnia. Sa primu undada, chi pertocat su Latinu repubricanu o crassicu (sèculus III e I i.C.), est lòmpia giai giai in totu sa Sardìnnia, de is costeras finsas a is montis de mesu (is Brabaxas), ca is romanus ant conchistau totu sa Sardìnnia, finsas sa de mesu. Sa segundu undada de latinisadura, chi pertocat su Latinu imperiali (sèculus I – IV p.C.), est lòmpia in Sardìnnia in is costeras e in Campidanu sceti, chena de lompi in mesu a s’Isula.
Custa tioria dominadora aintru de sa Linguìstiga (M.L. Wagner; M. Pittau; E.B. Ferrer), est serbia po spricai is diferèntzias intra de Sardu campidanesu (prus “annoadori”) e Sardu logudoresu (prus “arcàicu”). Po mori de custa latinisadura diferenti agataus fromas diferentis de Sardu.
Massimo Madrigale su Dotori.
Po ndi sciri de prus (bibliografia):
- Wagner.M.L.; La Lingua sarda; Ilisso.
- Blasco Ferrer Eduardo; Linguistica sarda: storia metodi e problemi; Condaghes.
(Is librus inditaus in custu giassu Internet ddus agatais me in sa Biblioteca Comunali de Siddi e su Comunu ddus at comporaus cun su dinai de sa lei nr 482/1999).